首先，要讚一讚班學生。二十歲出頭就要頂住咁大壓力，鎂光燈鏡頭下自信滿滿娓娓道出他們追求的理想及反抗政治現狀的理據，不卑不亢！
想當年同年紀時大學歲月，雖則都有搞「so」，但都只係蜻蜓點水，沒有瞓身甚至罷課瞓街，反而走堂拍拖去補習搲銀就會！
我也同情班官，你估佢哋真係好想坐係班學生對面，成為「扼殺香港未來民主發展的千古罪人」？佢哋都係打工，香港嘅專業打工仔的精神，就係老闆要咩就算死都要幫佢死掂佢。所以佢哋重複論點，遊花園是基本伎倆，如果「叻」啲嘅就使出「你睇我唔到」嘅幻術，坐足全程，好似當年奧運籃球弱隊撞正由米高佐敦帶領的美國隊，只係等完哨一刻九秒九衝出去圍（不是圍球證）米高換波衫，完成終極目標。
力度要啱啱好
你會問，份工咁辛苦，點解唔辭？查實每人於事情背後都有苦衷。我哋做生意嘅，最忌就係俾人焗住上，粗鄙啲就係俾人揸住嗰「袋」。揸住你嗰袋嘅人知所鬆緊，大力啲你哎痛冇力做唔到嘢，細力喲你feel唔到又唔識做嘢，力度啱啱好就可以揸住個袋帶你四圍走。所以我也很同情王導演或其他香港商家，佢哋出盡力去unfriend人或者拿出似是而非的論據去支持現政權的種種手段，在市民眼中，卻只看到一個訊息，就係佢嗰袋最近被揸緊咗而已！哎得愈大聲嗰個就梗係俾人揸得愈緊喇！
其實CY梁生何嘗不是俾人揸住嗰「袋」。張主任話佢完全知道UGL單嘢，仲早過我哋添！咁即係佢係其中一個揸「袋」人。唔怪得CY同咁多政府官員成日叫人袋住先！袋咗之後會唔會俾人揸番住郁不得其正？
講開UGL單嘢，我就有啲嬲！何解？原來行家會計師有啲咁正嘅避稅（唔係！）係稅務規劃嘅橋。本來可以一橋多賣，賺個盤滿鉢滿，而家不經意的流出市面，我相信會有不少人攞嚟「抄」考。雖然我唔冀望稅務局長會行出來單挑CY嘅稅務顧問，質詢點解顧問可越俎代庖，做埋佢份工，可決定某人的收入是否應課稅收入。但局長應該向普羅納稅人重申按本港稅法，香港人應遵行稅務條例向稅局報備年度收入，需不需納稅應由局長決定。
我有朋友正跟稅務局角力，就一些他認為是資本性收入信來信往，但稅局唔理三七二十一都先勒令他買幾百萬嘅儲稅券作押，直到稅局或法院作最終裁決為止。如果黃局長不企出嚟正視聽，話CY嘅報稅行為有「偏頗」，我諗好多朋輩稅務會計師真的要多謝CY，令到佢哋可以多接稅務顧問生意！
業界大佬只懂登報反佔中
雖然會計師好像多咗一條財路，但係我不嬲都話錢要賺得其所。身為專業人士對社會要有承擔。CY收酬事件曝光後，政圈集中火力砌佢做特首仲去秘撈，成何體統。雖然有學者及議員為他開說此乃黃金握手，但我當時第一個反應是他有否就此收入報稅。不出所料，以佢為人當然沒有，又搵專業人士來遮擋。
本人不是稅務會計師，但跟不同稅務會計師討論此報酬收入，他們都會懷疑此部分收入應須納入香港稅網，概因他是亞太區主管，大部分職能在香港。如果合約其中責任為提供售後服務維繫業務及其人事更替，此等服務也應在香港發生，而相關收入應墮香港稅網。但直到目前為止，我們未見到一個有承擔的稅務會計專家出來作分析，為社會大眾提供客觀的評論。
會計師是功能界別，如果話不廢除功能界別的其中一個原因為議會需要專業人士的聲音及意見，但原來我們業界大佬除咗只懂登報反佔中外，遇到真正需要意見領袖時就龜縮，向權貴屈膝，這又是哪門子的專業聲音及承擔？
CY話月入萬四蚊的沒有選特首嘅政治權力，我想講，現時很多年青會計師入職時月薪不過萬四，他們又是否目不識丁，向民粹傾斜？怪不得年青人要瞓身瞓街抗爭了！
No comments:
Post a Comment